Sharp Slow Juicer 開光！~ 自家製鮮豆漿 ~

等咗成個星期, 終於可以為我嘅 Sharp 慢磨機開光~ 前一晚已經叫媽咪浸黃豆, 星期六一返到屋企飲完滋潤湯水, 即刻開箱!

 

 真身原來好大盒~ 仲好重手下!

 

 盒大嘅原因係左邊有兩個大膠筒用嚟盛載果汁果渣~

 

 開光第一擊 - 即製鮮豆漿!

(望見張圖, 唔駛講都知好成功啦 XD)

 獨立排出口又可以分別排出果汁及果渣，免卻隔渣這繁複步驟

 

黃豆要浸透一晚, 軟身先放落慢磨機

由於黃豆本身冇水份, 要加水一齊慢磨~

 

要清洗嘅部件只有三個, 全都輕易清洗同抹乾~

 (見 Thomson 嘅款仲有額外膠圈, 感覺部件較多)

 

4両黃豆就可以整到一大jar 豆漿~ (大約一公升)

(連青蛙都想跳落去游水 (豆漿?!) XD) 

 

 由於用生水榨豆漿, 最後要煮滾再加入糖/冰糖調味

(視乎個人喜好)  

 仲有少許豆渣可以隔走, 但豆渣營養豐富

飲少少都好, 唔用隔篩走~

 

 慢磨核心部份, 金屬鋼水好有質素

而且小孔多且細, 所以價錢會較貴

見過便宜一半嘅 Thomas 機, 會看得出分別~

 

 另外, 試榨果汁 -

由於食材要切開小件才可放入機慢磨, 所以要一塊專砌生果嘅砧板

(生同熟嘅食材要分開處理才夠衞生嘛, 好彩之前已考慮到呢點,

趁 sogo 週年慶買大送細時購入)

 

 被譽為好酸嘅橙兩個 + 一個小型好粉嘅蘋果

(由於趕清理,  冇影到成品, 但效果出奇地甜, 或者落咗少少蜜糖+蘋果夠甜嘅關係)

 

 慢磨後嘅黃豆, 豆渣好乾身

(豆渣可以翻榨一次, 加水後水係奶白色 ga , 唔好浪費)

 

其實豆渣有多種用途, 做肥料、做煎餅都好有營養, 下次決定唔好浪費, 一於物盡其用~

 

豆漿滾熱煮熟, 放涼後即刻放入雪櫃儲存, 放了雪櫃兩日後仍然保持新鮮

而且透心涼, 簡直消暑極品~ 有營養又解渴!

(豆漿從慢磨機製作排出後沒有再額外隔渣, 估唔到非常幼滑~ 真係反光 ga ~ 厲害!)

 

以我嘅製作, 4両黃豆可以製作一公升豆漿, 如果想濃稠嘅話, 豆渣唔好翻榨, 於我而言, 以上方法濃度剛剛好, 而且唔浪費黃豆~

 

慢磨機對於廚房嚟講真係新一代偉大發明, 部機易洗 (沒有煩複嘅 parts, 裝拆容易, Sharp 呢部只有 3 個parts)而且較安全 (因為沒有鋒利嘅刀片, 當然仍要小心, 始終眾多金屬小孔, 刮到都係會見血的), 整豆漿免去隔渣煩惱 (當年見媽咪用魚袋出盡力先出到豆漿), 認真方便到極, 亦都認同研磨嘅果汁比高速打爛嘅有營養更能保持鮮味~

 

近排天氣異常炎熱同埋悶焗, 出街買現成食物製品往往唔可靠, 人手、機器嘅衞生存疑, 好容易滋生大細菌 / 病毒 (最近有報導指街外大牌子、名店嘅竹蔗水/飲品含菌量嚴重超標), 自家製作不但可以做到真正無添加, 仲可以保持容器、食材嘅清潔度, 睇嚟往後幾個月成為我嘅新寵, 發掘它更多優點~